Алматы қаласында ауыр атлетикадан Тәуелсіздік күні мерекесіне арналған қалалық чемпионат аяқталды. Байрақты бәсекені Алматы қаласы дене шынықтыру және спорт басқармасы мен жергілікті ауыр атлетика федерациясы ұйымдастырды.
Қалалық біріншілікке 100-ге жуық тау көтерер толағайлар қатысса, олардың арасында Алматы қаласы, Алматы облысы мен Қырғызстанның спортшылары бар. 
Ерлер мен әйелдер арасында жүрген сайыс өте тартысты өтті. Жарыс қорытындысына сәйкес мына спортшылардың бағы жанып, жеңіс тұғырынан көрінді. Қыздар арасында жеңімпаз атанғандар: Жансая Рүстем (48 келі), Тылсымай Нұрымбетова (53 келі), Альбина Қадырбай (58 келі), Арай Нұрлыбекова (63 келі), Нұрай Елеуова (69 келі), Нұрай Қасеналиева (75 келі), Раушан Мешітханова (75 келіден жоғары). Ал ерлер арасында жеңіс туын тік көтергендер: Ринат Сайымбетов (30 келі), Абзал Тәліпбаев (34 келі), Сергей Бекарев (38 келі), айбар Шәкенов (42 келі), Қайнар Гайдар (46 келі), Марлен Төкен (50 келі), Жандос Мұқаш (56 келі), 
Асхат Ділдаев (62 келі), Бағдәулет Зарқымақбар (69 келі), Ринат Баударбеков (77 келі), Бекнар Ахмет (85 келі), Санжар Бекбосын (94 келі), Михайл Пахомчик (105 келі) және Сұлтан Ашанов (105 келіден жоғары).
Жеңімпаздарды марапаттау үшін Олимпиада ойындары мен әлем біріншілігінің чемпиондары мен жүлдегерлері – Майя Манеза, Зүлфия Чиншанло және Кирилл Павлов арнайы келіп, жеңістерімен құттықтады.
